Ош ОИИБи: "Баласынан кордук көрдү делген 80 жашка таяп калган энени милиция көчөдө ыйлап жүргөн жеринен тапкан"

Ош шаарындагы "Ак жүрөк" кризистик борборунда 80 жашка таяп калган эне баш калкалап жатканы маалымдалган. Борбордун директору Дарика Асилбекова ал учурда психологиялык, медициналык социалдык жардам алып жатканын айтты.

Эненин айтымында, өз баласынан кордук көрүп келген, баласы ага кол көтөрөт. Бүгүн 22-мартта Ош облустук ички иштер башкармалыгынын басма сөз катчысы Жеңиш Аширбаев SUPER.KG порталына бул иш боюнча тергөө жүрүп жатканын айтты.

Билдирүүгө ылайык, окуя 18-мартта Кара-Суу районундагы айылдардын биринде болгон.

"48 жаштагы жашоочу 78 жаштагы өзүнүн апасын урганы белгилүү болгон. Кыргыз Республикасынын Жоруктар жөнүндө кодексинин 75-беренесинин негизинде (үй-бүлөдөгү зомбулук) кылмыш иши козголуп, тергөө амалдары жүрүп жатат.

Тергөөнүн жүрүшүндө баласы мас болгонун, өзүнүн эмне иш кылып жатканын билбей калганын айткан. Ошол күнү эне үйүнөн чыгып кетип, көчөдө ыйлап жүргөн жеринен милиция кызматкерлери көрүп "Ак жүрөк" кризистик борборуна өткөрүп беришкен. Тергөө улантылууда, анын жүрүшүндө дагы маалымат берилет", - деди маалымат катчы.