Кайнатасын өлтүрүп, өз кызын зордуктаган адам кармалды

Жалал-Абад облусунун Базар-Коргон районунда мындан 6 жыл мурун болгон оор кылмыштын бети ачылды. Бул тууралуу ИИМдин маалымат кызматы билдирет. Киши өлтүрүү жана зордуктоо боюнча айыпталып, аталган райондун 53 жаштагы тургуну кармалды. Тергөө маалыматтарына таянсак, ал 2006-жылдын июль айында 75 жаштагы кайнатасы менен уруша кетип, муунтуп өлтүрүп койгон да, кылмышын жабуу максатында өлүктү Тентек-Сай дарыясынын жээгине көмүп койгон. Тергөөнүн жүрүшүндө кылмышка шектүү күнөөсүн моюнга алып, кылмыш болгон жерди көрсөтүп берди. 75 жаштагы абышканын сөөгү 2006-жылдын күз айларында аймактын тургундары тарабынан табылып, бирок өлүк таанылгыс болуп бузулуп кеткендиктен, маркумдун өздүгү такталбай калган. Кийин белгилүү болгондой, бул окуядан соң кылмышка шектүү Орусияга кетип калып, ал жакта 3 жылдай жашап, 2010-жылы аялы каза болгондо кайтып келген. Бул жаран мындан сырткары да башка кылмышка шектелүүдө. 2011-жылдын октябрь айында ал өз үйүндө 19 жаштагы кызын зордуктап, андан кийин да зордуктоону улантып келген. Бул фактылар боюнча Базар-Коргон РИИБинин тергөө бөлүмү тарабынан Кылмыш жана жаза кодексинин 97-беренеси (киши өлтүрүү) жана 129-беренеси (зордуктоо) боюнча кылмыш иши козголуп, тергөө жүрүп жатат.