Жалал-Абадда колуна чынжыр байланган кыз апасы менен жолугушуудан баш тартууда

Жалал-Абадда колуна чынжыр байланган кыз апасы менен жолугушуудан баш тартууда. Буга чейин апасы тарабынан ал клей жыттап, ичимдик ичип жүргөн деген маалыматтар текшерилүүдө. Бул тууралуу бүгүн, 27-мартта SUPER.KG порталына Жалал-Абад шаардык эмгек жана социалдык өнүгүү башкармалыгынын социалдык кызмат көрсөтүү кызматынын башчысы Назира Жакыпова билдирди.

Маалыматка ылайык, учурда кыз калыбына келтирүү борборунда окуусун улантууда.

"Бул окуя боюнча учурда тергөө амалдары аягына чыга элек. Буга чейин кыздын апасы аны менен жолугууга аракеттенген, бирок кыз ага каршылыгын көрсөтүп, жолугушуудан баш тартты. Апасы жергиликтүү каналдардын бирине берген маегинде өспүрүм жаман жолго түшүп, ичимдик ичип, клей жыттаган деген маалыматтар текшерилүүдө. Кыз медициналык кароодон өткөрүлүп, дарыгерлер өпкөсүн да текшеришти. Анын жыйынтыктары тиешелүү мекеменин кызматкерлерине өткөрүлүп берилмекчи.

Учурда өспүрүм кыз Жалал-Абад шаардык балдарды калыбына келтирүү "Акжол" борборунда жашап жатат. Тартипке ылайык, ал борбордо 6 ай убакыт болот. Андан сырткары, биздин кызматкерлер кыз менен энесинин мамилесин жакшыртып, экөөнү элдештирүү аракеттерин көрүүдө", - деди Жакыпова.

Окуянын чоо-жайына кайрылсак:

19-февралда байпакчан, колуна чынжыр тагылган кыз ыйлап жаткан видео тараган. Кийин кыздын ата-энеси ал 6 айлык кезинде ажырашып кеткени жана аны апасы жалгыз тарбиялап келгени белгилүү болгон. Кийин өспүрүм кыз буга чейин да үйүнөн 2 жолу качып, кайра кайтарылганы белгилүү болгон.