Июлда балдардын туулгандыгы тууралуу күбөлүгүнө кошумча тиркеме берүү токтотулат. Мамлекеттик каттоо кызматы себебин түшүндүрдү

Ушул жылдын 1-июлунан тартып балдардын туулгандыгы тууралуу күбөлүгүнө чет өлкөгө чыгуу үчүн кошумча тиркелип келген аныктама берүү токтотулат. Бул тууралуу Мамлекеттик каттоо кызматы кабарлады.

Мекеменин басма сөз катчысы Дамира Азимбаева SUPER.KG порталына билдиргендей, ал документтин коргоо элементтери жок болгондуктан Мамлекеттик каттоо кызматы тарабынан ушундай токтом кабыл алынды.

"Ата-энелер 16 жашка чыга элек балдарын Өзбекстан, Казакстан же Орусияга алып чыгып кетип бара жаткан болсо, анын Кыргыз жараны экенин тастыктоо үчүн күбөлүгүнүн ичине аныктама тиркелчү. Бирок анда коргоо элементтери жок болчу. Себеби чек арадан өтүүсү үчүн эле ак кагазга баланын сүрөтү чапталып, мөөр басылчу. Коргоо элементтери жок болгондуктан жасалмалоого, бурмалоого орун берилип кеткен учурлар көп болгон. Балдардын коопсуздугун камсыз кылуу үчүн биз ал аныктаманы 1-июлдан тартып жокко чыгарып жатабыз.

Эгерде бир ай аралыгында жогоруда аты аталган 3 өлкөгө чыгып келиши керек болсо, бир айлык мөөнөт менен берип жатабыз, 1-июлдан кийин аны да бербейбиз. Ошол себептүү ата-энелер жалпы эрежелер менен 530 сомго паспорт алуулары керек болот", - деди Азимбаева.