ТЕСТ: Путин атындагы чоку, анын бою, кыздары... Орусиянын президенти тууралуу тесттен өтүңүз

1999-жылы президент болгон Владимир Путиндин тушунда АКШнын 3 башчысы алмашты. Алар Билл Клинтон (1993-2001-жылдары президент болгон), Жорж Буш (2001-2009-жылдары президент болгон), Барак Обама (2009-2017-жылдары президент болгон. Учурда АКШнын башчысы Дональд Трамп.

Журналисттер Владимир Путинден "Коррупцияга каршы күрөшүү фонду" уюмунун лидери Алексей Навальный тууралуу суроолорду бергенде, ал бул оппозиционердин атын атабай жооп берип келет. Муну Путин Навальныйга жарнама кылбоо керек деп түшүндүрөт.

2008-жылы орусиялык басылмаларда көркөм гимнастика боюнча спортчу Алина Кабаева менен Владимир Путиндин боло турган үйлөнүү тою тууралуу макала чыккан. Бул кабарды ири дүйнөлүк басылмалар көчүрүп чыгышкан. Кабаеванын пресс-катчысы бул маалыматты төгүндөөнү талап кылган. Путин үйлөнүү тою тууралуу макалада "бир да чын сөз жок" деп жооп берген.

2015-жылы Владимир Путин он жаштагы Балыкчыдагы Даша Яицкаяга ньюфаундленд тукумундагы күчүктү белек кылган. Окуучу кыз май айында Орусиянын президентине кат жазган. Ал мындай күчүк жөнүндө көптөн бери кыялданып жүргөнүн айткан.

2018-жылы медиафорумда Путин эмнеге кол саатын оң колго тагынганын түшүндүргөн. "Мунун сыры жөнөкөй. Кол сааттын буроочу башы колумду жоорутпашы үчүн оң колго тагынып жүрөм" деген журналисттерге Орусиянын президенти.

Кремлдин расмий сайтындагы маалымат боюнча, Путин Орусиянын президенти катары Кыргыз Республикасына 9 жолу келген. Учурдагы 10-мамлекеттик иш сапары болуп саналат.

2015-жылы Владимир Путин Сириядагы аскердик операция тууралуу айтып жатып, Ленинградда өткөн бала чагын эстеген. "50 жыл мурун Ленинграддагы көчө мени бир эрежеге үйрөткөн: эгер мушташууга аргасыз болсоң, биринчи урушуң керек".

Орусиянын президентинин авиапаркында бир нече учак бар, бирок көбүнчө иш сапарларга Ил-96 үлгүсүндөгү учак пайдаланылат. Анда өлкө лидери үчүн бардык шарттар түзүлгөн, жадакалса спорттук залы да орун алган. Учактагы бөлмөлөрдүн жайгашышы жердеги чоң үйдү эске салат. Конференция залы, учкучтардын тамактануучу, уктоочу бөлмөсү да бар. Коштоп жүрүүчү кызматкердин айтымында, учакта жүргөн адам үйүндө жүргөндөй эле болот.

Президент Владимир Путин - "Бирдиктүү Орусия" партиясынын лидери. Бул саясий уюм 2001-жылы түзүлгөн. Учурда анын 2 миллиондон ашуун мүчөсү бар. "Бирдиктүү Орусия" парламентте көпчүлүк мандатка ээ.

1991-жылы Орусиянын алгачкы президенти болуп шайланган Ельцин 1999-жылдын 31-декабрында ордун ал кездеги премьер-министр Владимир Путинге ыктыярдуу түрдө өткөрүп берген. Андан бери Путин өлкө башчы болуп келет. 2008-2012-жылдары гана анын жакын санаалашы Дмитрий Медведев президенттик кызматты аркалаган.

Орусиянын президентинин расмий бою 170 сантиметр. Орусияда жана Европада эркектердин боюнун орточо узундугу 175-178 сантиметр болгондуктан, Путиндин боюн кичине деп эсептешет.

Кремлдин расмий маалыматы боюнча, Орусиянын президентинин 2 кызы бар: Мария 1985-жылы туулган, Катерина 1986-жылы туулган. Путин маалымат жыйындарынын биринде кыздары тууралуу сүйлөп жатып, алар бизнес менен да, саясат менен да алектенбегенин айткан. "Алар Орусияда жашайт, орусиялык жогорку окуу жайларында билим алышкан" деген Путин.

1983-жылы Владимир Путин 30 жашында 25 жаштагы Людмила Шкребнева менен баш кошкон. Арадан 30 жыл өткөн соң, тагыраагы, 2013-жылы Путин менен Шкребнева расмий түрдө ажырашканын коомчулукка жарыялашат. Шкребнева 2016-жылы Артур Очеретный аттуу ишкерге турмушка чыккан. Ал эми Путиндин учурда расмий жубайы бар же жок экени белгисиз.

“В.Путин атындагы чоку” Чүй облусунун Москва районундагы, Ак-Суу дарыясынын бассейниндеги, Жар-Таш дарыясынын оң жактагы куймасынын оң жагындагы тоо кыркасында, 4446 метр бийиктикте орун алган. 2011-жылы Владимир Путиндин ысымы менен Ала-Тоодогу чокулардын бирин атоо демилгесин Москва райондук кеңешинин депутаттары көтөрүп чыгып, аны премьер-министр Алмазбек Атамбаев колдоого алган. Мыйзам долбоор даярдалып, Жогорку Кеңеш да аны колдоп, президент Роза Отунбаева мыйзамга кол койгон.