Кыргыз мамлекетиндеги Орусиянын элчилигинин алдында Путинге каршы пикетке чыккан активист Карымшаков аялы менен бирге эки айга камалышы мүмкүн

Кечээ, 27-мартта активист Нурлан Карымшаков аялы менен бирге Кыргыз мамлекетиндеги Орусиянын элчилигинин алдында Орусиянын президенти Владимир Путинге каршы митингге чыккан. Аларды Бишкектин Биринчи Май РИИБинин кызматкерлери кармап кеткенин укук коргоочу Рита Карасартова SUPER.KG'ге тастыктады.

Карасартованын айтуусунда, Карымшаковдун колундагы плакаттарда "Путин - оккупант, агрессор" деген жазуулар болгон.

"Карымшаковду аялы экөөнү тең Биринчи Май райондук ички иштер бөлүмүнүн кызматкерлери кармап кетишиптир. Алардын колундагы плакаттарды экспертизага беришип, биздин "дежур" эксперттер 5 мүнөттө "улут аралык кастыкты жаратуучу чакырыктар бар" деген корутунду чыгарып беришти. "Оккупант" деген сөздү "улут аралык кастыкты жаратуу" деп коюшуптур.

Ошондой эле милиция кызматкерлери кечээ кечинде Карымшаковдун үйүн тинтүүгө алышкан. Бирок эч нерсе тапкан жок. Биринчи Май райондук ички иштер бөлүмүнүн тергөөчүсү Жазык кодексинин 313-беренеси "Улут аралык кастыкты козутуу" тууралуу айыптоо корутундусун чыгарып берди. Эми эки күндүн ичинде Бишкектин Биринчи Май райондук соту Карымшаков менен аялынын баш коргоо чарасы боюнча эки айга камоо тууралуу ишти карайт. Аларды камоого эч кандай негиз жок. Бирок бийлик бүгүнкү күндө өз билгенин кылат. Ал эми соттор бийликке көз каранды, өз алдынча чечим чыгара алышпайт", - деди Карасартова.