Бишкекте Орусиянын элчилигинин алдына пикетке чыккан жубайлар эч жакка кетпөө тил каты менен камактан бошотулду

Бишкекте Орусиянын элчилигинин алдына пикетке чыккан жубайлар Нурлан Карымшаков менен Гүлназ Имаева эч жакка кетпөө тил каты менен камактан чыгарылды.

Алардын баш коргоо чарасын 28-мартта Бишкектин Биринчи май райондук соту жабык эшик артында карады. Бул тууралуу укук коргоочу Рита Карасартова жазды.

Анын айтымында жактоочу нааразычылык билдирип чыккандарды кармоо мыйзамсыз экенин аныктоо үчүн сотко өтүнүч келтирген.

Активист Нурлан Карымшаков аялы менен бирге Орусиянын Кыргыз жериндеги элчилигинин алдында Орусиянын президенти Владимир Путинге каршы митингге чыккан.

Андан кийин аларды Бишкектин Биринчи Май РИИБинин кызматкерлери кармап кетип түн ортосуна чейин суракка алышкан. Колдорунда "Путин - оккупант, агрессор" деген жазуулар болгон.

Жазылган сөздөргө экспертиза жүргүзүлүп, жыйынтыгында "улут аралык кастыкты жаратуучу чакырыктар бар" деген корутунду чыгарылган.