Тышкы иштер министрлиги Орусиядагы Кыргыз жарандары үчүн миграциялык мунапысты колдонуу жол-жоболорун маалымдады

Тышкы иштер министрлиги Орусия Кыргыздын жарандарына карата буга чейин жарыяланган миграциялык мунапыстын жол-жоболорун кайра карап чыккандыгын кабарлады. Бул тууралуу мекеменин расмий сайтында айтылат.

Белгилүү болгондой Орусия Федерациясында жүрүү мөөнөттөрүн бузган Кыргыз жарандарына 2019-жылдын 1-апрелинен 22-апрелине чейин Орусиядан чыкпай эле легалдашуу мүмкүнчүлүгү берилет.

"Андыктан, миграциялык мунапысты колдоно турган Кыргыз жарандары жогоруда белгиленген убакыт аралыгында Орусия ИИМинин миграция маселелери боюнча башкы башкармалыгынын каалаган райондук бөлүмүнө Кыргыз Республикасынын колдонуудагы паспорту менен келүүсү керек. Ал жактан миграциялык каттоого коюу менен жаңы миграциялык карта берилет.

Документтери жок жарандар жарыяланган мунапысты колдонуу үчүн Кыргыз Республикасынын Орусиядагы Элчилигинен же консулдук мекемелеринин биринде өлкөгө кайтуу күбөлүгүн даярдап, Орусиядан 2019-жылдын 22-апрелине чейин чыгып кетүүсү керек. Кайра Кыргыз Республикасында алган паспорттун негизинде Орусиянын аймагына каалаган убакта кирүүгө болот", - деп айтылат маалыматта.

Бул миграциялык мунапыс соттун чечиминин негизинде Орусиянын аймагына кирүүгө тыюу салынган Кыргыз жарандарына берилбейт.

Тактай турган маалыматтарды алуу үчүн номерлер: +79251032911, +74992383304, +79252917272, +74957807413, +74957807412, +74957807410.