Украинада президенттик шайлоо өтүп жатат. 39 талапкер жарышка катышууда

Бүгүн, 31-мартта Украинада президенттик шайлоо өтүп жатат. Катышып жаткан 39 талапкердин 19у саясий партиялардын атынан чыгышса, 20сы өзүн-өзү көрсөткөндөр. Алардын арасында Украинанын учурдагы президенти Петро Порошенко, экс-премьер Юлия Тимошенко жана куудул Володимир Зеленский дагы бар. Бул тууралуу чет элдик басылмалар жазышууда.

Маалыматка караганда шайлоо участкалары эртең мененки саат 8:00дөн тартып 20:00гө чейин иштешет. 72 чет мамлекетте 101 шайлоо участогу иштеп баштады.

Шайлоого чейин жүргүзүлгөн сурамжылоодо эч кайсы талапкер биринчи турда 50 пайыздан ашык добуш топтой албай тургандыгы көрсөтүлгөн.

Сурамжылоонун 28-марттагы көрсөткүчү боюнча куудул Володимир Зеленский алдыда келе жаткан. Социалдык топтор түзгөн рейтингде аны украиналыктардын 26,6 пайызы колдоого даяр экени белгилүү болгон. Андан кийин экс-премьер, "Батькивщина" партиясынын лидери Юлия Тимошенко (17 пайыз) болсо, үчүнчү орунда азыркы президент Петро Порошенко (10 пайыз) турган. Калган талапкерлерди колдогондор 10 пайызга жеткен эмес.