Чүй облусунун аймагында поезд менен жеңил унаа сүзүшүп кетти, курман болгондордун арасында бир жашар бала бар

Чүй облусундагы Москва районунда бүгүн, 31-мартта поезд менен жеңил унаа сүзүшүп кетти. Алдын ала маалыматтар боюнча 3 адам каза болду. Алардын бири 2018-жылы туулган бала болсо, экинчиси анын атасы. Апасы Москва райондук ооруканада жандандыруу бөлүмүндө. Бул тууралуу Чүй облусу боюнча Жол кыймылынын коопсуздугун камсыздоо кызматы билдирди.

"Хонда Аккорд үлгүсүндөгү унаанын айдоочусу Төө-Ашуу тарапка бара жаткан кезде темир жолдон өтүп бара жатканда поезд менен сүзүшүп кеткен. Ал жолдо шлагбаум жок. Болжол менен айдоочу корголбогон жайдан өтүп кетем деп поезддин астына кирип кеткен. Унаада 5 адам болгон. Кырсыктын кесепетинен 2 чоң киши каза болду. Андан сырткары 1 жашар бала көз жумду", - деп билдирди басма сөз катчы.

Күбөлөр кырсык Кызыл-Дыйкан айылынын аймагында болгонун билдиришкен эле. Чүй облусу боюнча Жол кыймылынын коопсуздугун камсыздоо кызматы кырсык Петровка-Нарзан жолундагы ээн талаада болгонун тастыктады. Мындан сырткары ошол жол менен "Сосновка" постуна барууга мүмкүн экенин кошумчалашты.