Дүйнөдөгү эң кымбат картина жоголду

Чет элдик жалпыга маалымдоо каражаттары Леонардо да Винчинин 400 миллион долларга сатылган "Ааламдын куткаруучусу" аттуу картинасы жоголгонун жазышууда.

Маалыматка ылайык, картина Абу-Дабидеги Лувр музейинин филиалына өткөн жылдын сентябрь айында коюлушу керек эле. Бирок шаар бийлиги картина эмнеге коюлбаганын ачыктоодон баш тартышкан.

Айрым басылмалар Луврда иштеген анонимдүү булактарга таянып, "Ааламдын куткаруучусу" жоголуп кеткендигин жазышууда. Белгилүү болгондой, картина кайда экендигин Париждеги да, Абу-Дабидеги да музейдин жетекчилиги билишпейт.

Аталган картина 2017-жылы аукцион аркылуу 400 миллион долларга сатылып, бардык салыктарды кошо эсептегенде 450 миллион долларга жеткен. Леонардо да Винчинин эмгегин Сауд Арабиясынын ханзаадасы Бадер бин Абдулла бин Мохаммед бин Фархан Аль Сауд сатып алган.