Кубанычбек Кулматов менен Албек Ибраимовдун иши боюнча соттук отуруму 10-апрелге жылдырылды

Бүгүн, 3-апрелде Бишкектин Ленин райондук сотунда экс-мэрлер Кубанычбек Кулматов жана Албек Ибраимовдун соттук отуруму жылдырылды.

Соттук отурумда, Албек Ибраимовдун жактоочусу ар апта сайын соттук отурумдун жылдырылып жатышы туура эмес деп эсептээрин белгиледи.

Ал эми судья учурда башка райондо соттук отурум башталгандыктан жана жактоочулардын үчөө ал жакта болгондуктан, бүгүнкү отурум кийинкиге жылдырылганын айтты.

Ал эми бул чечимге айыпталуучулардын жакындары нааразы болушту.

Окуянын чоо-жайына кайрылсак:

Кубанычбек Кулматовго карата 2018-жылдын май айында "коррупция" беренеси боюнча кылмыш иши козголуп, июнь айында камакка алынган. Ал Бишкек шаарынын мэри болуп турган кезде Калыс-Ордо конушундагы мектеп жана бала бакчага бөлүнгөн акчаны мыйзамсыз колдонгон деп айыпталууда.

Албек Ибраимовго карата 2018-жылдын май айында “ишенип берилген мүлктү ыйгарып алуу же жок кылуу” беренеси боюнча кылмыш иши козголуп, бул иш экс-мэрдин “Дастан” ишканасын жетектеп турган мезгилге байланыштуу экендиги айтылган. Июль айында ал ушул эле кылмыш ишинин негизинде камакка алынган.

Кийинчерээк Ибраимовго карата “коррупция” беренеси боюнча жаңы айып угузулган. Анда ал Бишкек шаарынын түштүк аймагында жайгашкан муниципалдык жер тилкелерин мыйзамсыз сатууга айыпталууда. Ушул жылдын 6-мартынан тартып Кулматов менен Ибраимовдун иштери бириктирилип, сотто карала башталды. Эки экс-мэрдин ишине байланыштуу жалпысынан 14 адамга айып коюлган