"Цементтелген ажаткананын тешигине чоң адам батпагандыктан эмне кыларыбызды билбей калдык" дейт ажатканага түшүп кеткен 1 жарым жаштагы наристени куткарган жаран

Кечээ, 2-апрелде Бишкектеги Арча-Бешик конушунда дааратканага 1 жарым жашар кыз түшүп кеткен. Наристени коңшулары 7 жашар баланы аркан менен дааратканага түшүрүп, аман алып калышкан. Бул тууралуу SUPER.KG порталына наристени ажатканадан алып чыккандардын бири Урмат Маматов билдирди.

Анын айтымында, окуя саат 17:00 чамасында орун алган. Анда 2 жарым жана 1 жарым жашар кыз короонун ичинде ойноп жатып, кичинекейи ажатканага түшүп кеткен.

"Мен бул үй-бүлө менен кошуна турам. Жумуш кылып жатсам эле кыйкырык чыгып калды. Барсак эле кыз дааратканага түшүп кетиптир. Эмне кыларыбызды билбей калдык. Себеби ажаткананын отурчу жери цементтелгендиктен, тешигине чоң адам батпайт. Тереңдиги 5 метрдей бар. Цементти талкаласак сыныгы кыздын бир жерине тиеби деп да корктук. Ал убакта кыз ыйлап жаткан, бир убакта үнү чыкпай калды. Көчөгө чыгып эле ойноп жүргөн бир кичине баланы чакырдык.

Анын белине аркан байлап эле түшүрдүк. Алгач бала көрүнбөй жаткан. Эламан түшөрү менен алдынан бирөө түртүп жибергенсип, өйдө чыгып калды окшойт. Эламан шак эле көтөрүп чыкты. Мен ала коюп эле крандагы агып жаткан муздак сууга бир сыйра чайкай салып, үйгө көтөрүп кирдик. Ошол замат ооруканага алып кетишкен. Азыр кыздын ден соолугу жакшы экен. Эч жеринен жаракат албаганын айтышты. Ал эми биз ымыркайды аман алып калып жатканыбызга сүйүнүп жатабыз", - дейт Маматов.

Ошондой эле алар ӨКМнын куткаруу кызматын чакырышкан эмес. Болгону тез убакытта чара көрүлгөндүктөн кыз аман калды деп кошумчалайт Урмат Маматов.

Ал эми кызды куткарган баланын аты-жөнү Эламан Абдилашимов 2-класстын окуучусу. Анын бул эрдигин кошуналары баалап, ал эми наристенин ата-энеси ыраазычылык билдирип жатышат.