Эшек бизнесинин башында Ветеринардык жана фитосанитардык коопсуздук боюнча мамлекеттик инспекциясынын башчысы турабы? Мекеменин жообу

Кечээ, 4-апрелде Жогорку Кеңештин жыйынында депутат Тынчтык Шайназаров Кыргыз өлкөсүндөгү эшек бизнесинин башында Ветеринардык жана фитосанитардык коопсуздук боюнча мамлекеттик инспекциясынын башчысы Калысбек Жумаканов турарын айткан. Бүгүн аталган мекеменин басма сөз кызматынын башчысы Рахат Садырбекова депутаттын айткандарын төгүнгө чыгарды.

Анын айтымында, Жумакановдун эшек бизнесине эч кандай катыштыгы жок. "Калысбек Жумаканов ушул жылдын январь айында "Токойлуу-Сай" ишканасына 40 миң ондатранын терисин экспорттоо үчүн уруксат бергени чын. Бирок эшектин терисине эч кандай уруксат берген эмес. Биздин кызмат аткезчилик товарларга көзөмөл кылууга укугу жок. Ошондуктан ишкер ондатраны экспорттоого алган уруксат кагазынын негизинде эмнелерди экспортко алып кетти, кандай аткезчилик аракеттерди жасады, биз билбейбиз. Балким, биздин кызматтын көзөмөлүнөн кийин ишкер эшектин терисин жолдо бара жатып кошуп алган", - деди Садырбекова.