Билим берүү министрлиги мектептерге телевизор сатып алууда мамлекетке 7 миллион сомдон ашык зыян келтирилгени аныкталды

Билим берүү жана илим министрлиги мектептерге телевизор сатып алууда мамлекетке 7 миллион сомдон ашык зыян келтирилгени аныкталды. Мындай маалыматты Башкы прокуратура кабарлады.

Маалым болгондой, 2016-жылдын 14-сентябрында министрлик 4 миң 236 комплект телевизорду (дубалга иле турган куралы, антеннасы менен чогуу) сатып алуу боюнча сынак өткөргөн. Ал телевизорлорду республиканын 2 миң 118 мектептерине чейин жеткирүү менен министрликтин кызмат адамдары сатып алуулар жөнүндө мыйзамдардын талаптарын бузушкан. Башкача айтканда, телевизорлордун баасын негизсиз жогорулатышкан.

Сынактын талаптарына туура келбегендигине карабастан "АР" ишканасы жеңүүчү деп табылган жана аны менен келишим 129 миллион 731 миң 736 сомго түзүлгөн (1 телевизор 30 626 сом болгон). Ошол эле учурда аталган ишкана жогоруда белгиленген телевизордун бирөөсүн 19 миң 398 сомдон сатып алган, натыйжада айырма 47 миллион 561 миң 808 сомду түзгөн.

Мындан тышкары, ишкана жалпы билим берүүчү мектептерге телевизорду жеткирүү жана орнотуу мөөнөтүн бузганына карабастан министрлик тарабынан 3 миллион 891 миң 952 сом өлчөмүндөгү айыптык санкциялары салынып жана өндүрүлгөн эмес. Андан тышкары, берүүчүнүн кызыкчылыгы үчүн жеткирүү мөөнөтү да негизсиз узартылган. Ошентип, министрликтин кызмат адамдары жана комиссиянын мүчөлөрү жүктөлгөн милдеттерин талаптагыдай аткарбагандыгынын натыйжасында мамлекетке 7 миллион 235 миң 88 сом зыян келтирилген.

Текшерүүнүн жыйынтыгы боюнча министрликтин кызмат адамдарынын мыйзамсыз иш-аракеттеринин тергөө максатында Кылмыш-жаза кодексинин 320- (Кызматтык абалынан кыянаттык менен пайдалануу) жана 234- (Ачык тооруктарды, аукциондорду же тендерлерди өткөрүүнүн тартибин бузуу) беренеси менен иш козголуп, сотко чейинки өндүрүш башталды.