Хоккей боюнча Дүйнө чемпиондугунун тандоо турунда ойноп жаткан Кыргыз курама командасына 4 техникалык жеңилүү жазылды

Хоккей боюнча Дүйнө чемпиондугунун тандоо турунда ойноп жаткан Кыргыз курама командасына 4 техникалык жеңилүү жазылып, оюнчу Александр Титов дисквалификацияланды. Бул тууралуу Хоккей федерациясы билдирди.

Маалыматка ылайык, эл аралык Хоккей федерациясынын мындай кадамына Титовдун мурда Орусияда ойноп келгендиги себеп болгон.

"Буга чейин Кыргыз курамасы 4 беттеште жеңүүчү аталып, алдыда келе жаткан жана III дивизионго чыгуу укугу үчүн Бириккен Араб Эмираттарына каршы ойномок. Бирок беттештин алдында уюштуруучулар кыргыз курамасына буга чейинки 4 оюн үчүн техникалык жеңилүү жазылганын жана Александр Титовдун беттештерден четтетилгенин билдиришти.

Титов мурда Орусияда ойногон. Биз аны биздин курама командада ойноосу үчүн уруксат сурап, 30-мартта эл аралык федерация тарабынан уруксат берилген. Уюштуруучулар 5-апрелде гана бул туура эмес экенин айтышып, биздин жеңиштерибиз жокко чыгарылды", - деп айтылат маалыматта.

Хоккей боюнча Дүйнө чемпиондугуна тандоо туру 31-марттан баштап 6-апрелге чейин созулду. Мелдешке 6 өлкө катышып, кыргыз курамасы алгачкы 4 оюндун баарында жеңишке жетишкен. Ал эми талаа ээлери менен өткөн акыркы беттеште кыргыз хоккейчилери Александр Титовдун катышуусусуз 7:4 эсебинде жеңишке жетишти. Бирок техникалык жеңилүүнүн натыйжасында Кыргыз өлкөсү акыркы орунду ээлеп, Бириккен Араб Эмираттары III дивизионго жолдомо алды.