Депутат айыл чарба тармагы ИДПга канча салым кошконун сурады

Бүгүн, 8-апрелде Жогорку Кеңештин комитет жыйынында депутат Мирлан Бакиров айыл чарба, токой чарба тармагы ички дүң продукциясына канча салым кошуп жатканын сурады.

Айыл чарба, тамак-аш өнөр жайы жана мелиорация министри Нурбек Мурашев билдиргендей, 2018-жылы 203 миллиард 800 миллион сомго айыл чарба продукциясы өндүрүлдү. Анын айтымында, айыл чарба тармагы ички дүң продукциясына 11,6 пайыз салым кошту.

Өкмөткө караштуу курчап турган чөйрөнү коргоо жана токой чарбасы мамлекеттик агенттигинин директору Абдыкалык Рустамов учурда Улуттук статистикалык комитети токой чарба тармагы ички дүң продукцияга канча салым кошконун санап жатканын айтты. Ал жакынкы күндөрү расмий маалымат бере турганын билдирди.

Агрардык саясат, суу ресурстары, экология жана регионалдык өнүктүрүү боюнча комитетинин жыйынында өкмөттүн отчёту каралууда.