Орусиялык ырчы Баста менен келген гитарачы спорт ордосунун мышык ыйлаган абалын баракчасына жүктөдү. "Бишкек. 30 жыл артка"

6-апрелде Бишкек шаарына орусиялык ырчы Баста келип, күйөрмандарына концерт тартуулап кетти. Ырчы менен келген музыканттардан турган топ даярдык үчүн спорт ордосуна барышкан. Эл кире элек учурда Николай Сарабьянов аттуу гитарачы Инстаграм баракчасына Каба уулу Кожомкул атындагы спорт ордосунун абалын тартып жүктөгөн. Андан сыры кеткен тактай пол, отургучтарынын булгаарысы айрылган, жешилип, сүрүлгөн абалын көрүүгө болот. Николай Сарабьяновдун "Бишкек шаары. Убакыт машинасы бизди 30 жыл артка алып барды" дегенин угууга болот.

Видеонун алдына көпчүлүк кыргыз колдонуучулар спорт ордосу үчүн уялып жатышканын жазып, президенттин жана башка бийлик өкүлдөрүнүн Инстаграмдагы баракчаларын белгилеп кетишкен. Ал эми гитарачы өзү аларга Бишкек кереметтүү шаар экенин, күйөрмандар жогорку деңгээлде кабыл алышканын айтып өткөн.

Спорт ордосунун курулганына 45 жылга жакын убакыт болду. Аталган ордо концерттик жана спорттук иш-чараларды өткөрүүгө ылайыкталып, 1974-жылы 3 миң адам бата тургандай курулган.