Баткендин Сай айылын жаандан кийин белгисиз курт каптап кетти дейт жашоочулар

Баткен районуна караштуу Сай айыл аймагында жаандан кийин белгисиз майда кара курттар чыгып каптап жатат. Мындай маалыматты Эмилбек Эшматали уулу аттуу жергиликтүү тургун SUPER.KG'ге кабарлады. Анын айтымында курттар жаан менен кошо жааганы же жаандан кийин пайда болгону белгисиз. Учурда курттар көбөйүп жатат дейт ал.

"4-апрелде Сай айылына жаан жааган. Ошондон кийин эле биз мурда көрбөгөн белгисиз кара курттар чыгып, айылды каптап кетти. Алар сууда эле эмес, кургакта да жүрө беришет экен. Көлчүктүн баары капкара, бак-шак, чөп-чардын баарын аралап кеткен. Айрымдардын үйлөрүнө чейин кирип жатат. Улуу кишилерден сурасак, буга чейин мындайды көргөн эмеспиз дешет. Айдоо-себүү учурунда капыстан каптаган белгисиз курттан кооптонуп жатабыз. Атайын адистер келип курттун кайдан пайда болгонун аныктап, дары-дармек чачып беришсе жакшы болот эле. Азыр эми өрүк гүлдөп, эккен-тиккен жер-жемиштерибиз өнүп калды", - дейт Эшматали уулу.

Тургун кошумчалагандай, кадимки дуст жана башка зыянкечтерден арылуучу дарыларды сээп жаткандары менен бул курттар өлбөй жатат. Ага атайын адистер чара көрбөсө болбойт дейт ал.