Валентина Шевченко менен жолуккан күйөрманы көзүнө жаш алды (сүрөт)

Сүрөттү Табылды Кадырбеков тарткан

Мушкер Валентина Шевченко учурда Кыргыз жеринде. Ал Бишкектеги соода борборлордун биринде күйөрмандары менен жолугушуу өткөрдү. Шевченко алгач эл алдында сөз сүйлөп жатып, Кыргыз жериндеги күйөрмандарынын ага болгон колдоосу жана сүйүүсү беттеш учурунда чоң дем бере турганын белгиледи. "Сиздер ар дайым мени менен жана жүрөгүмдөсүздөр. Сиздердин мага болгон сүйүүңүздөр, колдооңуздар менин жеңишке жетишүүм үчүн мага өзгөчө дем берет", - деди ал.

Андан кийин күйөрмандары тарабынан 10дон ашык суроо берилди. Бирок суроо берүүдөн дагы аны менен сүрөткө түшүүнү каалагандар көп болду. Алардын бири Шевченко менен сүрөткө түшкөн соң, көзүнө жаш алды.

Мушкер туулган жерине 8 жылдан бери биринчи ирет келип отурат. Валентина Шевченко 1988-жылы Бишкек шаарында төрөлгөн. Ал тай боксу жана К-1 версиясы боюнча Дүйнөнүн 17 жолку чемпиону, тай боксу боюнча аялдар арасында Дүйнөнүн мыкты спортчусу наамынын ээси. UFС уюумунун 62 килограммга чейинки салмак категориясынын рейтингинде 1-орунда турат.

Апасы Елена Шевченко таэквондо менен машыккандыктан кыздары Валентина менен Антонина дагы спортко жакын болуп өсүшкөн. Валентина 5 жашында спорттун ар кайсы түрү менен машыгып, 6 жашынан эле мелдештерге чыга баштайт.

Кийин Павел Федотов аттуу машыктыруучу алып, аны октон күлүк, темирдей катуу кылып тарбиялап чыккан.

Валентина Шевченкого муай тайдан Кыргыз өлкөсүндө, Азияда атаандаш жок болуп калган. Кийин Валентина Шевченко дзюдо боюнча "Кыргыз Республикасынын Спорт чебери" аталган. Эркин күрөш боюнча көп мелдештерде байгелүү орун алган. Атактуулуктун арты менен түрдүү семинарларга, сыйлуу жайларга чакырыла баштаган. Ошондой деңгээлге жеткен соң каарманыбыз Орусияга жөнөп, кийин бокс боюнча айымдар арасында "Орусиянын чемпиону" аталган. Анан семинарлардын биринде Перудан баш тартылгыс сунуш түшүп, ошол өлкөгө аттанган. Учурда Перу өлкөсүндө машыгат. Таймаштарга Перунун жана Кыргыз мамлекетинин желектерин көтөрүп чыгат.

Шевченко 2018-жылдын декабрь айында өткөн соңку беттешинде польшалык Йоанна Енжейчик менен беттешип, жеңил салмактагы чемпиондук курга ээ болгон. Анын кийинки беттеши 9-июнда АКШлык Жессика Айга каршы өтөт.

Мушкер акыркы жолу Кыргыз жерине 2011-жылы келип, Ысык-Көлдө окуу-машыгуу жыйындарын өткөргөн.