Валентина Шевченкону Ош шаарында кемсел кийгизип, жоолук салып тосуп алышты

UFC`нин чемпиону, кыргыздан чыккан мушкер Валентина Шевченко бүгүн, 9-апрелде Ош шаарына барды. Бул тууралуу SUPER.KG`ге Ош шаардык мэриясынын басма сөз катчысы Азамат Абсатаров кабарлады.

Анын айтымында, Шевченкону аэропорттон Ош облусундагы өкмөттүн ыйгарым укуктуу өкүлү, шаар мэри баш болгон аткаминерлер жана 300дөн ашуун күйөрмандар тосуп алышкан.

"Мушкер эртең мененки саат 8де учуп келди. Аны көптөгөн кыргыз желегин кармаган күйөрмандары тосуп алышты. Учурда Валентина Шевченко кортеждин коштоосунда мейманканага бара жатат. Ал саат 10:45те жалпыга маалымдоо каражаттары үчүн маалымат жыйын өткөрөт. Ал эми саат 18:00дө Ош шаарынын борбордук аянтында күйөрмандары менен жолугушуу пландалган", - деди маалымат катчы.

Ал эми облустук администрациянын кызматкери Бектеналы Абдырахманов шаар тургундары Шевченкого кемсел кийгизип, башына жоолук салып тосуп алганын кошумчалады.