Францияда чочко союп жеген аял соттолду

Франциянын Бретань өрөөнүнүн тургуну үй жаныбары катары багып жүргөн чочкону союп жеп алганы үчүн соттолду.

Чет элдик маалымат булактарынын жазганына караганда, Бейб аттуу 2 айлык торопойду жаныбарларды коргоочу уюмдун кызматкерлери өлүмдөн сактап калышкан. Куткарылгандан кийин торопой 2 жыл бою жаныбарларды кармоочу жайда багылган. Жаныбарлар багылуучу жай башка районго көчүп жаткандыгына байланыштуу Бейбге кожоюн издеп башташат. Мекемеге кошуна жашаган 40 жаштагы аял чочкону багып алууга макул болгон. Приюттун жетекчилиги аял менен келишим түзүп, анда чочкону эт катары пайдаланууга эмес, үй жаныбары катары багууга кол койдурган.

Бейбди багуудан тажап кеткен кожойке чочконун көзүн тазалоо үчүн мурдагы күйөөсүнө кайрылган. Ал касапчыны ээрчитип келип чочкону аттырып, жиликтетип берген. Кандайдыр бир себептерден улам полиция кызматкерлери билип, аялдын үйүн тинтүүгө алганда 110 килограмм консерваланган жана майдаланган эт табылган. Окуяга аралашып калган мурдагы күйөөсү суракка алынганда, ал аял чочкону жеш үчүн эле бакканын айтып берген.

Сот аялды мал союучу жайда эмес, үйүндө жаныбар өлтүргөнү жана ишенип берилген нерсеге карата кыянаттык кылганы үчүн 500 еврого (40 миң сомдун айланасы) айыпка жыккан. Ошондой эле ал шарттуу түрдө 3 айга эркинен ажыратылган.