Өткөн жылы өлкөдө 6 миңге жакын жол кырсыгы катталып, анын кесепетинен 716 адам каза болду

2018-жылы өлкө аймагында 5 миң 995 жол кырсыгы катталып, оор жаракаттардан улам 716 адам каза болду. Бул тууралуу бүгүн, 9-апрелде Жогорку Кеңештин укук тартиби, кылмыштуулук менен күрөшүү жана коррупцияга каршы аракеттенүү боюнча комитеттин жыйынында вице-премьер-министр Жеңиш Разаков билдирди.

“Жол кырсыгынан каза болгондордун саны 2017-жылга салыштырмалуу 907ден 716га азайды. Эң көп жол кырсыктары Бишкек жана Чүй облусунун аймагында катталып, алардын саны 3 миң 242ни түздү.

Өлкөдө 29 миң 718 кылмыш катталып, анын ичинен 1 миң 715и оор жана өзгөчө оор кылмыш катары катталган. Бүгүнкү күндө өмүр бою эркиндигинен ажыратылган жарандардын саны 345 адамды түзөт”, - деди Разаков.

Жогорку Кеңештин укук тартиби, кылмыштуулук менен күрөшүү жана коррупцияга каршы аракеттенүү боюнча комитети өкмөттүн 2018-жылы аткарган иштери тууралуу маалыматты укту.