Ошто Валентина Шевченкого элечек да кийгизишти. Мушкер "Сулайман-Тоо" музейине барып, андан кийин 10 миңге чукул күйөрманы менен жолугушту

UFC`нин чемпиону, кыргыздан чыккан мушкер Валентина Шевченко бүгүн, 9-апрелде Ош шаарына барды. Ал өз кезинде "Сулайман-Тоо" музейинде да болду. Шаардагы жолугушуулардын биринде мушкерге кыргыздын улуттук кийимин, элечек кийгизишти. Ага чейин шаар тургундары Шевченкого кемсел кийгизип, башына жоолук салып тосуп алган эле.

Андан соң Валентина Шевченко борбордук аянтта күйөрмандары менен жолугушту. Мушкер менен жолугуу үчүн 10 миңге жакын күйөрманы келди. Бул тууралуу шаардык дене тарбия жана спорт комитетинен билдиришти.

Белгилүү болгондой иш-чарага анын машыктыруучусу Павел Федотов, "Кулатуу Эртаймаш ММА" федерациясынын президенти Руслан Кыдырмышев, Валентина Шевченконун апасы Елена Шевченко, шаардык дене тарбия жана спорт комитетинин төрагасы Кылычбек Саркарбаев катышты.

"Борбордук аянтта атайын концерттик программа коюлду. Күйөрмандар Валентина Шевченкого кызыктырган суроолорун беришти. Кызыктуу суроо бергендерге мушкер белектерин берди", - деп билдиришти аталган комитеттен.