Кант шаарында 12 жаштагы баланы уурдап кеткендер изделүүдө. Окуя видеого түшүп калган

Кант шаарында белгисиз адамдар 12 жаштагы баланы таксиге салып уурдап кетишти. Маалыматты Чүй облустук Ички иштер башкармалыгынын басма сөз кызматы тастыктады.

Белгилүү болгондой, окуя бүгүн, 11-апрелде саат 8:40 чамасында болгон.

"11-апрелде саат 9:00 чамасында Ысык-Ата райондук ички иштер бөлүмүнө 12 жаштагы бала уурдалганы боюнча маалымат келип түштү. Иликтөө иштеринин жүрүшүндө Кант шаарынын 2-кичи районунда белгисиз адамдар Хонда Фит үлгүсүндөгү унаага 12 жаштагы Данил Браилкинди күч колдонуу менен салып, из жашырып кеткендиги аныкталды.

Учурда бул факт Кылмыштардын жана жоруктардын бирдиктүү реестрине катталып, сотко чейинки өндүрүшкө алынды", - деп айтылат маалыматта.

Чүй облустук Ички иштер башкармалыгы жоголгон баланын турган жерин көргөн-билгендер болсо же сүрөттөгү ак түстөгү унаа тууралуу маалыматтарды төмөнкү телефондор аркылуу кабарлап коюуну өтүнөт:

102; 0312 430 127; 0312 438 885; 0700 282 699.