Судан өлкөсүндө аскердик төңкөрүш орун алып, 30 жыл башкарып келген президент кызматынан алынды

Чыгыш Африкада жайгашкан Судан өлкөсүндө аскердик төңкөрүш орун алып, президент Омар аль-Башир үй камагына алынды. Бул тууралуу дүйнөлүк басылмалар жазышууда.

Маалыматка ылайык, 11-апрелде Судандын Куралдуу күчтөрүнүн башкы штабынын отуруму орун алып, ага президент да катышкан. Отурумда аскер кызматкерлери президентке кызматынан алынганын билдиришкен. Мындан сырткары, президенттин жакын адамдары, санаалаштары жана өкмөт отставкага кетип, 100дөн ашык аткаминер камакка алынган.

Судандын коргоо министри жакынкы 2 жылда өлкөнү аскердик кеңеш башкарып, андан кийин шайлоо болорун билдирди. Ошондой эле өлкөдө 3 айга өзгөчө кырдаал жарыяланып, 24 саатка учактар үчүн аба мейкиндиги жана чек ара жабылды.

Президент Омар аль-Башир Суданды 30 жылдан бери башкарып келген. Өткөн жылдын декабрь айынан бери өлкөдөгү саясий кырдаал курчуп, 20дан ашык шаарларда жарандар демонстрацияга чыгып башташкан. Алгач нааразы болгон эл нандын баасынын арзандашын талап кылса, кийинчерээк президенттин отставкасын талап кылып башташкан. 4 айдан бери уланып жаткан нааразычылык акцияларында ондогон карапайым жашоочулар каза болгондугу айтылууда.

Айрым батышчыл басылмалар демонстранттарды басуу үчүн Омар аль-Баширди колдогон Орусиянын аскердик күчтөрү жардам берип жатканын жазышкан. Ал эми Орусия Тышкы иштер министрлигинин өкүлү Суданда орусиялык жеке күзөт фирмалары жалданып иш алып барып жатканын билдирген.