Футболчу Диего Коста сезондун аягына чейин футболдон четтетилди

Мадриддик "Атлетико" клубунун чабуулчусу Диего Коста сезондун аягына чейин футболдон четтетилди. Бул тууралуу Испаниянын спорттук басылмалары жазышууда.

Маалыматка ылайык, Коста Испан футбол федерациясы тарабынан 8 беттешке дисквалификацияланды. Буга футболчунун 7-апрелде өткөн "Барселона" - "Атлетико" беттешиндеги жоругу себеп болду.

7-апрелде испан чемпиондугунун алкагында "Барселона" клубу "Атлетикону" 2:0 эсебинде жеңип алган. Беттештин 28-мүнөтүндө Диего Коста калыска карата кемсинткен сөздөрдү айткан үчүн кызыл айып кагазы көрсөтүлүп, оюндан четтетилген.

"Атлетико" клубу сезондун аягына чейин 7 беттеш өткөргөнүнө байланыштуу, Коста бул сезондо талаага чыкпайт. Ошондой эле кийинки сезондун алгачкы беттешине катыша албайт.

Диего Коста 2010-2014-жылдарда "Атлетико" клубунун катарында ойногон. 2014-жылы "Челси" клубуна өтүп, 2018-жылы кайра мадриддик клубга кайтып келген. Ал жалпы жонунан "Атлетико" үчүн 124 оюнда 48 гол жараткан.