Кара-Балтада 31 жаштагы келин өзүн-өзү атып каза болду. Анын жанынан кат табылган

Чүйдүн Кара-Балта шаарында 31 жаштагы келин өзүн-өзү мылтык менен атып каза болду. Бул тууралуу Чүй ОИИББинин басма сөз кызматы билдирди.

Маалыматка ылайык, окуя 11-апрель күнү болгон. Анда Жайыл районунун аймактык ооруканасына өз өмүрүнө кол салуу болгону тууралуу маалымат келип түшкөн. Окуя болгон жерге ыкчам-тергөө тобу барып, 11-апрель күнү саат 14:00 чамасында 31 жаштагы Х.М. аттуу аял өзүн-өзү мылтык менен сол көкүрөк тушуна атып, окуя болгон жерден каза болгонун аныкташкан. Аялдын жанынан "өлүмүм үчүн эч кимди күнөөлөп кереги жок" деген кат табылган.

Ок атылган мылтык каза болгон келиндин 59 жаштагы кайнатасы Х.В.га таандык. Анын айтымында, курал дайыма сейфте турчу. Бирок келин мылтыкты эч кимге билгизбей алып чыгып атынган. Маркум жолдошу Х.М. менен жашап, экөөнүн ортосунда 7 айлык кызы бар болгон. Учурда бул факты Жайыл РИИБинин Кылмыштардын жана жоруктардын бирдиктүү реестрине катталып, сотко чейинки өндүрүшкө алынган.