Майлуу-Сууда февраль айында жоголгон 16 жаштагы Камиланын жансыз денеси табылды

Майлуу-Суу шаарында февраль айынан бери дайынсыз жоголгон 16 жаштагы Камила Абдубаитованын жансыз денеси табылды. Бул тууралуу өспүрүм кыздын бир тууган агасы Бексултан Абдубаитов билдирди.

Анын айтымында, Камиланын жансыз денеси адырдан табылган.

"Карындашымдын сөөгү гана калыптыр. Кимдир-бирөө тарабынан өлтүрүлгөнүн же башка фактыларды экспертиза аныктайт. Учурда Майлуу-Суудагы өлүкканада. Себеби медициналык экспертиза жүргүзгөн адамдар бошой албай жатат. Бирок кечке чейин бизге жууп, тазалап беришет. Сөөгү бүгүн эле жерге берилет", - дейт ал.

Буга чейин 18-февралда Камила Абдубаитовага издөө салынган. Ал мектепке кеткен боюнча үйгө кайтып келбегени айтылган.