Майлуу-Сууда изделип жаткан 15 жаштагы окуучу курбуларынын үйүнөн табылды

Жалал-Абад облусунун Майлуу-Суу шаарында 5-апрелден бери дайынсыз болуп жаткан 15 жаштагы Диляра Абдурасулова табылды. Бул тууралуу Жалал-Абад ОИИБинин басма сөз кызматы билдирди.

Маалыматка ылайык, ал 13-апрель күнү курбуларынын үйүнөн табылган.

"Изделип жаткан кыз ата-энесинин колуна өткөрүлүп берилди. Болжолдуу маалыматтар боюнча апасына таарынып, ушундай кадамга барган", - дейт облустук милициядан.

Диляра Абдурасулова 5-апрель күнү мектепке кеткен боюнча үйүнө кайрылып келбегендиктен изделип жаткан. Ал ошол күнү мектепке да барган эмес. Апасынын айтымында, ал акыркы күндөрү спорт менен машыгып үйүнө кеч келе баштаган. Мындан улам кыздын апасы аны машыгууга жибербей турганын айткан. Акыркы жолу эне-баланын ортосунда ушул боюнча сүйлөшүү болгон.