Белгилүү актриса Сальма Хайектин жолдошу Парижде өрттөнгөн чиркөөгө 100 миллион евро которду

Парижде өрттөнгөн Нотр-Дам чиркөөсүн калыбына келтирүү үчүн жергиликтүү миллиардер үй-бүлөсүнүн атынан 100 миллион евро которду. Чет элдик басылмалардын маалыматына ылайык, кайрымдуулук ишти жеке ишкер Франсуа-Анри Пинонун үй-бүлөсү жасаган.

"Атам Франсуа Пино экөөбүз өрттөнүп кеткен чиркөөнүн оңдоо иштерине "Artemis" компаниябыздын жалпы фондунан 100 миллион евро каражат бөлүп жатабыз", - деген ал.

Франсуа-Анри Пино - белгилүү актриса, режиссёр, продюсер Сальма Хайектин жолдошу. Жеке ишкер "Kering" компаниясынын башкы директору. Аталган компанияга "Yves Saint Laurent", "Balenciaga", "Gucci" жана "Alexander McQueen" кийимдер бренддери таандык.

Кечээ, 15-апрелде жергиликтүү убакыт боюнча саат 18:30 чамасында чиркөөдө өрт башталган. Окуя болгон жерге Франциянын президенти Эммануэль Макрон барган. Ал чиркөөнүн айланасына чогулган жарандарга тез арада калыбына келтирүү иштери жүргүзүлөрүн убадалаган.