2018-жылы эң көп кылмыш Бишкекте, эң аз кылмыш Талас менен Нарын облустарында катталган (тизме)

Бүгүн, 17-апрелде Жогорку Кеңештин жалпы жыйынында Кыргыз Республикасындагы мыйзамдуулуктун абалы жөнүндө жана аны чыңдоо боюнча прокуратура органдары тарабынан 2018-жылы аткарылган иштер тууралуу башкы прокурор Өткүрбек Жамшитов отчёт берүүдө.

Анын маалыматына ылайык, 2018-жылы жалпы республика боюнча 29 миң 706 (2017-жылы 27 миң 706) кылмыш катталып, өткөн жылдын ушул мезгилине салыштырмалуу 2 миң кылмышка көбүрөөк катталган.

Аймактар боюнча кылмыштардын саны:

Бишкек шаарында 12 миң 620,
Ош шаарында 2 миң 372,
Чүй облусунда 4 миң 886,
Жалал-Абад облусунда 2 миң 674,
Ош облусунда 2 миң 284,
Ысык-Көл облусунда 2 миң 322,
Баткен облусунда 1 миң 107,
Нарын облусунда 733,
Талас облусунда 708.

"Оор жана өзгөчө оор кылмыштардын саны 2017-жылга салыштырмалуу 14,1 пайызга төмөндөгөн. Ошол эле учурда катталган оор жана өзгөчө оор кылмыштардын ичинен 823 (2017-жылы 957) кылмыш өзгөчө оор кылмыштардын түрүнө кирип, жалпы катталган кылмыштардын 2,8 пайызын түзүп, былтыркы жылга салыштырмалуу 134 кылмышка төмөндөгөн", - деди Жамшитов.