Анжелина Жоли фамилиясын алмаштырды

Америкалык актриса Анжелина Жоли-Питт фамилиясын мурункудай эле Жоли деп өзгөрттү. 43 жаштагы Анжелина Жоли фамилиясын актёр Бред Питтке турмушка чыккандан кийин Жоли-Питт деп өзгөрткөн. Чет элдик маалымат каражаттарынын жазгандарына таянсак, актрисанын фамилиясын өзгөрткөнү соттун чечиминде жазылган фамилиясынан улам билинген.

Актёрлор 15-апрелде официалдуу түрдө, тактап айтканда, соттун чечими менен ажырашышты. Анжелина Жоли менен Бред Питтин ортосунда мүлк бөлүшүү жана ортодогу 6 баланы кандай шартта багуу тууралуу сүйлөшүү болмокчу.

Буга чейин интернет жана маалымат каражаттарында Анжелина Жоли үй-бүлөнү сактап калуу үчүн соттук иштерди атайын созуп жатат деген маалыматтар тарап келген. Питт менен Жоли ажырашып жаткандыгы тууралуу алгачкы маалымат 2016-жылдын күзүндө белгилүү болгон. Актёрлор 10 жыл чогуу жашагандан кийин расмий түрдө 2014-жылдын август айында үйлөнүшкөн.