Өткөн жылы ымыркайларды сатуу боюнча 10 кылмыш иши ачылган

Өткөн жылы ымыркайларды сатуу боюнча 10 кылмыш иши ачылган. Бул тууралуу бүгүн, 17-апрелде Жогорку Кеңештин жыйынында башкы прокурор Өткүрбек Жамшитов билдирди.

Депутат Карамат Орозова акыркы учурда социалдык тармактарда балдардын жоголгондугу тууралуу маалыматтар көп тарап жатканын айтты. "Бул боюнча канча кылмыш иши козголду, канча бала табылды, канчасы дайынсыз болууда?" - деп сурады депутат.

Жамшитов жооп бергендей, 2018-жылы ымыркайларды сатуу боюнча 10 кылмыш иши ачылган, анын ичинен жетөө бир өндүрүшкө бириктирилди. "Эки кылмыш иши боюнча 8 адамга карата кылмыш иши ачылып, учурда кылмыш иштери соттук органдарына өткөрүлүп берилген", - деди баш прокурор.

Бүгүн Жогорку Кеңештин жалпы жыйынында Кыргыз Республикасында мыйзамдуулуктун абалы жөнүндө жана аны чыңдоо боюнча прокуратура органдары тарабынан 2018-жылы аткарылган иштер тууралуу башкы прокурор отчёт берүүдө.