Орусияда күйөөсү эски диванды өрттөп салды. Аялы анын ичине 1,5 миллион рублду батир алуу үчүн чогултуп келген

Орусиянын тургуну ичинде 1,5 миллион рубль катылганын билбей эски диванды өрттөп салган. Бул тууралуу бүгүн, 19-апрелде орусиялык маалымат каражаттары жазып чыкты.

Маалыматка ылайык, окуя Брянск шаарында орун алган. Анда үйүндөгү эскилиги жеткен буюмдардан арылууну чечкен жергиликтүү тургун эски диванды да кошо өрттөп салган.

"Бул окуя тууралуу жергиликтүү банктын эксперти Людмила Грицук айтып берген. Аталган жаран үй алам деп акча чогултуп, аны темир чайнекте сактап келген экен. Үйүн жыйнап жаткан аялы чайнекти эски диванга бекитип, бирок бул тууралуу күйөөсүнө айтпай калган. Күйөөсү аялы үйүндө жок учурда эски буюмдарды, эски диванын да өрттөп салган. Ал диванда көп убакыттан бери чогулткан акчалары болгонун кийин уккан. Натыйжада 1,5 миллион рублдун ичинен жарым-жартылай күйгөн 117 миң 500 рублду банк аркылуу алмаштырууга мүмкүн болгон", - деп айтылат маалыматта.