2 айга камакка алынган Бакчиевдин апасы: "Эгер балам уурдаган болсо, "өлүмгө тике кара" демекмин"

"Балам Мамлекеттик каттоо кызматынын статс-катчысы Данияр Бакчиев бюджеттен бир тыйын уурдаган жок, ак жеринен камалды", - деп бүгүн, 19-апрелде маалымат жыйынында Бакчиевдин апасы Райхан Мамытова билдирди.

Анын айтымында, баласы Япониядан билим алып, Кыргыз өлкөсүн өнүктүрүү максаты болгон. "Балам башында Кадр кызматында иштеген. Кийин сынактан утуп Каттоо кызматына дайындалган. Эртеден кечке чейин иштечү. Тендер боюнча аны негизсиз айыптап камакка алышты. Балам бюджеттен бир тыйын алган жок. Эгер ал уурдаган болсо, мен Курманжан датка апабыздай "өлүмгө тике кара" демекмин. Бирок балам уурдаган жок, ак жеринен камакка алынды", - деди Мамытова.

17-апрелде Бишкек шаарынын Биринчи Май райондук сотунун токтому менен Мамлекеттик каттоо кызматынын жетекчилери 2 айга УКМКнын СИЗОсуна камакка алынган. Айыпталып жаткандар "Инфоком" мамлекеттик ишканасынын директору Талант Абдуллаев, Мамлекеттик каттоо кызматынын статс-катчысы Данияр Бакчиев жана Мамлекеттик каттоо кызматынын төрагасынын орун басары Русланбек Сарыбаев. Алар жаңы муундагы биометрикалык паспортторго бланк даярдоо боюнча өткөрүлгөн тендердеги мыйзам бузуулар боюнча айыпталууда.