ЖЭБ соту. Айыпталып жаткан энергетиктер 2 жарым жылдан 8 жылга чейин эркинен ажыратылды

Бүгүн, 19-апрелде Бишкек шаарынын Биринчи Май райондук сотунда Бишкек ЖЭБиндеги өндүрүштүк кырсык боюнча кылмыш иштеринин бирине сот чечим чыгарды.

Жыйынтыгында:

Улуттук энергетикалык холдинг компаниясынын мурдагы төрагасы Айбек Калиев 2 жыл 6 айга абак жазасына тартылып, мамлекеттин пайдасына 100 миң сом өлчөмүндө айып пул салынды;

"Электр станциялар" ачык акционердик коомунун мурдагы директору Узак Кыдырбаев 4 жылга эркинен ажыратылып, 150 миң сом айып пул салынды;

Улуттук энергетикалык холдинг компаниясынын төрагасынын мурдагы орун басары Нурлан Садыков 2 жыл 6 айга эркинен ажыратылып, 100 миң сом айып пул салынды; Ал сот залынан камакка алынды.

"Электр станциялар" ачык акционердик коомунун директорунун мурдагы орун басары Бердибек Боркоев 8 жылга эркинен ажыратылып, 150 миң сом айып пул салынды;

ЖЭБди жаңылоо боюнча долбоордун аткаруучу директору Темирлан Бримкулов 2 жыл 6 айга эркинен ажыратылып, 100 миң сом айып пул салынды;

ЖЭБдин мурдагы башчысы Нурлан Өмүркул уулу 4 жылга эркинен ажыратылып, 150 миң сом айып пул салынды; Ал сот залынан камакка алынды.

ЖЭБдин мурдагы башкы инженери Нургазы Курманбеков 4 жылга эркинен ажыратылып, 150 миң сом айып пул салынды.

Айып пулдан сырткары сот айыпталуучуларды мамлекетке 3 миллион 212 миң 259 сом төлөп берүүнү милдеттендирди. Мындан тышкары "Электр станциялар" ишканасынын арызынын негизинде ишкананын пайдасына 8 миллион сом төлөө чечими чыгарылды. Калган 26 миллион 321 миң сом төлөтүү доо арызын сот караган жок.