Бишкек шаардык кеңешинин "Өлбөс полк" акциясына катышуу боюнча окуу жайлардын жетекчилерине жазган каты талкууга алынды

Бишкек шаардык кеңешинин 9-Май - Жеңиш күнүнүн 74 жылдыгына карата "Өлбөс полк" акциясына катышуу боюнча окуу жайлардын жетекчилерине жазган каты интернетке тарады.

Андагы маалыматка ылайык, кат шаардык кеңештин төрагасынын орун басары Русланбек Жакышовдун атынан жазылган.

"Ушул жылдын 9-май күнү Улуу Ата Мекендик согуштун 74 жылдыгына карата "Өлбөс полк" акциясы уюштуруларын билдиребиз.

Акция саат 9:00дө башталып, 12:00дө жыйынтыкталат. Бул иш-чара Улуу Ата Мекендик согуштун катышуучуларын унутпоого чакырык болуп саналат жана өсүп келе жаткан муунду тарбиялоого татыктуу үлгү боло алат.

Акциянын маанилүүлүгүн эске алуу менен, сиздердин окуу жайдын бул иш-чарага катышуусун сурайбыз", - деп жазылат маалыматта.

Социалдык тармактардын колдонуучулары өз пикирлеринде окуучуларды же студенттерди мажбурлап мамлекеттик иш-чараларга тартуу туура эмес экендигин белгилешүүдө. Буга чейин аткаминерлерди күтүп, окуучулардын эс-учун жоготуп кулап калган окуялар болгонун да эске салгандар болду.

2015-жылы Ош шаарында Улуу Жеңиштин 70 жылдыгына арналган иш-чарада ошол учурдагы өкмөт башчы Темир Сариевдин келишин күтүп отурган бир ардагер менен окуучу кыз эс-учун жоготуп кулап калышканы маалым болгон. Көп өтпөй Темир Сариевдин тапшырмасы менен бийлик өкүлдөрүн тосуу үчүн мектеп окуучуларын тартууга тыюу салынган.