“Бизди карап көргүлө, баары мүмкүн”. Зеленский постсоветтик өлкөлөргө кайрылуу жасаса, Порошенко атаандашын жеңиши менен куттуктады

21-апрелде Украинада президенттик шайлоонун 2-туру болуп өтүп, ага биринчи турдан эң көп добуш алган талапкерлер куудул Володимир Зеленский менен учурдагы президент Петро Порошенко катышты. Алдын ала маалыматтар боюнча Зеленский 73,2 пайыз добуш алса, Порошенко шайлоочулардын 25,3 пайызынын колдоосуна ээ болгон.

Президенттик тактыга келишине бир кадам калган Зеленский өз штабында шайлоо тилкелери жабылгандан кийин билдирүү жасады.

“Мурунку СССРдин курамына кирген өлкөлөргө кайрылам, бизди карап көргүлө баары мүмкүн” деп билдирген Зеленский өзүнүн ата-энесине, жубайына жана командасына колдоосу үчүн ыраазычылыгын айтты.

Ал эми Петро Порошенко өзүнүн атаандашын жеңиши менен куттуктаганга даяр экенин билдирди.

“Кийинки айда мен президенттик кызматты тапшырам. Украиналыктардын көпчүлүгү ушуну чечти жана мен ал чечимди кабыл алам”, - деди Порошенко.

Мындан сырткары учурдагы президент саясаттан кетүү ниети жок экенин белгиледи.