Екатеринбургда кыргыздар менен тажиктердин ортосунда чыккан жаңжалдын видеосу интернетке тарады

Интернетте Орусиянын Екатеринбург шаарында жайгашкан автопарктардын биринде массалык мушташ тартылып калган видео тарады. Жергиликтүү маалымат каражаттарынын жазганына караганда, видеого түшүп калгандар Кыргыз жана Тажик жарандары экендиги айтылат. Окуя 19-апрелден 20-апрелге караган түнү болгон. Видео "ВКонтакте" социалдык түйүнүнө жайгаштырылганын Фергана News басылмасы жазып чыкты.

Маалыматта белгилүү болгондой, Маневров көчөсүндөгү автобустар токтоочу жайга мигранттар топтолушкан. Алдын ала маалыматтарга караганда жаңжалдын катышуучулары - кыргыз жана тажиктер. Видеодо көрүнгөндөй алардын саны 20га чукул. Жаңжалды видеого тартып алып баракчасына жүктөгөн автордун жазганына караганда, окуя болгон жерге күзөт кызматкерлери полиция чакырышкан эмес. Ошол себептен конфликт эмнеден улам келип чыкканы териштириле элек.