Депутат малга бирка басуунун баасы кымбат болуп жатканын айтты

Депутат Кенжебек Бокоев малды каттоодон өткөрүү иши жүрбөй эле, бир гана бирка басуу иши жүрүп жатканын айтты. Бул тууралуу ал бүгүн, 22-апрелде Жогорку Кеңештин комитет жыйынында билдирди.

Бокоев малга бирка басуунун баасы кымбат болуп жатканына токтолду. “Малга бирка басуунун баасы эмнеге 70 сомдон болуп жатат. Базардан 30 сомдон бирка сатып алып, 70 сомдон басуу туура эмес. Үстүнө эки эсе кошулууда”, - дейт депутат.

Ветеринардык жана фитосанитардык коопсуздук боюнча мамлекеттик инспекциясынын директорунун орун басары Кумар Исаков малды идентификациялоо иштери Кыргыз мамлекетинде биринчи жолу башталып жаткандыктан кемчиликтер бар экенин айтты. "Учурда малды каттоодон өткөрүү иши 60-70 пайыз болуп жатат. Биркалар базардан алынбайт, атайын алып келинет. Бирканын баасы 38 сомдон. Жеке ветеринарлар иш жүргүзгөндүктөн 70 сомдон басылат", - дейт Исаков.

Депутат мыйзам бузгандар гана эмес, мыйзамды аткарбагандар дагы жоопко тартыла турганын эскертти.