Боом капчыгайында урандын казылуусуна каршы митинг 300дөй адамдын катышуусунда өтүп жатат

Боом капчыгайында урандын казылуусуна каршы митинг башталды. Бул тууралуу бүгүн, 22-апрелде SUPER.KG`ге уюштуруучулардын бири билдирди.

Уюштуруучулардын айтымына караганда, учурда Боом капчыгайынын кире беришинде 300гө жакын адам чогулду. Алар уран казылат деген жерге барууну көздөөдө.

"Бир кезде Каркыра берилип кеткенде "дежур" аялдарды алып келип, жумуртка менен чабышкан. Балдар, азыр уран казылган жерге барганда акылсыздык кылып, таш менен урбагыла! Ата-бабаңардын арбагынан корккула, уранды каздырбайлы! Акча керекпи? Анда эл чогултуп берели!" - деди митингдин катышуучуларынын бири Дөөлөт Сыдыков.

Митингге катышууга келген Кеминдин тургуну Асанбек Кубатбек уулу "урандын калдыктарын тундуруучу эч нерсе жок болсо, ал каякка агат? Ысык-Көлүбүздү сактайлы!" деди.

Чогулгандар сүйлөп жаткандарга сөз бербей, катышуучулардын бири ызы-чууну токтотуп угалы деген сунушун билдирди.

Тоң районуна караштуу Көк-Мойнок айылынын башчысы Майрам Кыдыралиева: "Өзүм Балыкчы шаарында туулуп-өскөм. Баарыбыз мыйзамдуу өлкөдө жашайбыз. Өлкөнүн мыйзамдарына ылайык, бир дагы айыл өкмөтүнүн башчысы, бир дагы облустун ыйгарым укуктуу өкүлү кен байлыктарын иштетүүгө уруксат берүүгө акысы жок. "UrAsia in Kyrgyzstan" (Кыргыз өлкөсүндөгү ЮрАзия) ишканасына Кызыл-Омпол лицензиялык аянтында геологиялык чалгындоо иштерин жүргүзүүгѳ 2010-жылы лицензия берилген", - деди.

Буга чейин маалым болгондой, ушундай эле митинг 26-апрель күнү Бишкек шаарында өтүүсү пландалууда.