Балыкчыда 30 жаштагы жаран 13 жашар кызды зордуктоого шектелүүдө

Ысык-Көл облусунун Балыкчы шаарында 2006-жылы туулган окуучу кызды зордуктоо фактысы катталды. Окуяга шектүү адам кармалып, анын үстүнөн сотко чейинки териштирүү иштери жүрүүдө. Маалыматты SUPER.KG'ге Ысык-Көл ОИИБинин басма сөз кызматы тастыктады.

Маалыматка ылайык, 16-апрелде милиция кызматына жабырлануучу кыздын атасы арыз менен кайрылып, шектүүгө чара көрүп берүүнү өтүнгөн.

"Окуяга шектүү катары 1989-жылы туулган М.М. аттуу жаран кармалды. Окуяны жабырлануучу кыз ата-энесине айтып берген. Окуучу кыздын айтымында, М.М. аны "үйгө жаңы кийимдерди алып келдим, кирип көр" деп алдап алып кирип, жыныстык катнашта болгон. Зордуктоо фактысы март айынын аяк ченинде орун алган. Шектүү кыздын таанышы болгон", - деп билдирди басма сөз кызматы.

Окуя Кылмыштардын жана жоруктардын бирдиктүү реестрине каттоого алынып, сотко чейинки териштирүү жүрүп жатат.