Коррупционерлерден өндүрүлгөн миллиондогон акчалар эмнеге жумшалары айтылды

Коррупцияга каршы күрөшүүнүн натыйжасында өндүрүлгөн акчалар президенттин чечими менен социалдык объектилердин курулушуна жумшалат. Бул тууралуу бүгүн, 24-апрелде парламент жыйынында өкмөт башчы Мухаммедкалый Абылгазиев билдирди.

Анын айтымында, аталган акчага мектептер, бала бакчалар курулат. "Эгер дагы акча түшсө, өзүнчө чечим болот. Акча каражатынын кайсы жакка жумшала турганы боюнча силер менен кеңешишибиз мүмкүн. Президенттин чечими болот", - деди Абылгазиев.

2018-жылдын 22-июнунда премьер-министр Мухаммедкалый Абылгазиев коррупциялык иштерден өндүрүлгөн каражаттар үчүн атайын эсеп ачуу боюнча токтомго кол койгон.

Токтомго ылайык, бул эсепке экономикалык жана кызмат адамдарына козголгон кылмыш иштеринин алкагында алынган каражаттар топтолот. Анда мамлекетке келтирилген чыгымдар кайтарылып, өзүнчө эсепте сакталып, өкмөттүн чечими менен бөлүштүрүлөт.

2019-жылдын февраль айына карата коррупциялык иштерден өндүрүлгөн эсепке 1 миллиард 52 миллион 665 миң сом акча түшкөн.