Табып Хашим Зайналиев дарыгерлик ишмердүүлүгүн Оманда жүргүзүүгө уруксат алып, өлкөдөн көчүп кетти

Элдик дарыгер Хашим Зайналиев Оман өлкөсүнө көчүп кетти. Бул тууралуу SUPER.KG`ге журналист Бейшенбек Бекешов билдирди.

Анын айтымында, Зайналиевге дарыгерлик кылуу үчүн Оман өлкөсүнүн бийлиги уруксат берген.

"Табып Хашим Зайналиев бүгүн Оман өлкөсүнө учуп кетти. Жакында эле сот ага ишмердүүлүк жүргүзүүгө тыюу салган чечим чыгарган. Ушул сыяктуу бийликтин көрсөткөн кысымдарына чыдабай, ал өлкөдөн көчүп кетти. Омандын бийлиги Зайналиевге дарыгерлик кылууга уруксат бериптир. Өзү менен кошо 10 чакты мүшөккө дары чөптөрдү ала кетти. Аны узаткан бейтаптарынын каражаты жеткени артынан барып дарыланабыз дешсе, акчасы жоктор ыйлап-сыктап кала берди", - деди Бекешов.

Хашим Зайналиев буга чейин Саламаттыкты сактоо министрлигинин уруксаты жок Бишкектеги Көк-Жар конушуна жеке дарылоочу жай ачып, бир нече жылдан бери адамдарды өз алдынча дарылап келген. Буга байланыштуу табыпка карата кылмыш иши ачылып, бирок анын үстүнөн эч ким арызданбагандыктан кайра токтотулган.

Февраль айынын башында Октябрь райондук прокуратурасы 2018-жылдын 25-декабрында козголгон кылмыш ишти эске алуу менен райондук сотко табыптын ишмердүүлүгүн мыйзамсыз деп табуу жана лицензияланбаган дары-дармектерди колдонууга тыюу салуу боюнча арыз берген болчу.