Чүйдө 10 күн мурун жөө жүрүүчүнү унаасы менен сүзүп, качып кеткенге шектүү жаран кармалды

10 күн мурун жөө жүрүүчүнү унаасы менен сүзүп, качып кеткенге шектүү жаран кармалды. Бул тууралуу Чүй ОИИББинин басма сөз кызматы билдирди.

Белгилүү болгондой, 15-апрелде саат 22:50 чамасында Бишкек-Кордай унаа жолунун Ленин айылындагы тилкесинде айдоочу жергиликтүү тургунду унаасы менен сүзүп, окуя болгон жерден качып кеткен. Кырсыктын кесепетинен 1947-жылы туулган жаран алган жаракатынан ошол жерде жан берген.

24-апрелде оперативдүү издөө иш-чараларынын негизинде кылмышка шектүү адам кармалды. Ал Васильевка айылынын жашоочусу 1974-жылы туулган Ю.О. болгон. Анын Хонда Одиссей үлгүсүндөгү унаасы айып жайына жеткирилди. Факты боюнча материалдар сотко чейин тергөө иштерин жүргүзүү боюнча өндүрүшкө алынды.