Баласынан кордук көргөн 80 жашка таяп калган энени Ошто бир үй-бүлө камкордукка алып, багып алышты

Ош шаарындагы "Ак жүрөк" кризистик борборунда 80 жашка таяп калган эне баш калкалап жатканы маалымдалган. Борбордун директору Дарика Асилбекова энени бир үй-бүлө камкордукка алганын билдирди.

"Кара-Суу районунун Жоош айылынан бир үй-бүлө апаны камкордукка алып, багып алышты. Алар энени карап, тамагын берип, өз бүлөлөрүнө кошуп алуу ниетин айтып кайрылышкан. Атайын кызматкерлер алардын жашоо шартын карап көрүп, макул болду. Апанын учурдагы абалы жакшы. Маанайы көтөрүлүп, жакшы жашап жатат. Апа үйүндөгүдөй жүргүсү келгендигин айтып, карылар үйүн эмес, бул үй-бүлөнү тандаган", - деди Асилбекова.

18-мартта Кара-Суу районундагы айылдардын биринде 48 жаштагы тургун 78 жаштагы апасын урганы белгилүү болуп, Кыргыз Республикасынын Жоруктар жөнүндө кодексинин 75-беренесинин негизинде (үй-бүлөдөгү зомбулук) кылмыш иши козголгон.

Тергөөнүн жүрүшүндө баласы мас болгонун, өзүнүн эмне иш кылып жатканын билбей калганын айткан. Ошол күнү эне үйүнөн чыгып кетип, көчөдө ыйлап жүргөн жеринен милиция кызматкерлери көрүп, "Ак жүрөк" кризистик борборуна өткөрүп беришкен.