Бир керебетте 4-5тен, калганы полдо уктап жаткан Бишкектеги №1 "Шоола" балдар бакчасынын директоруна сөгүш берилди

Бир керебетте 4-5тен, калганы полдо уктап жаткан Бишкектеги №1 "Шоола" балдар бакчасынын директоруна сөгүш берилди. Учурда бала бакчада текшерүү иштери аягына чыга элек. Бул тууралуу бүгүн, 26-апрелде Бишкек шаардык билим берүү башкармалыгынын башчысы Сауле Мейрманова билдирди.

"Бала бакчанын директору Айнагүл Мадылбаевага сөгүш берилди, мындан бала бакчанын тиешелүү кызматкерлери да жазаланды. Видео тарагандан бери бала бакчада күн сайын текшерүү иштери жүрүп жатат. Бүгүн дагы бала бакчага барып, жаңы эле келдик. Мындай текшерүү кийинки жумада да улантылмакчы. Азыркы тапта иликтөө иштеринин жыйынтыгы чыга элек", - деди Мейрманова.

Окуянын чоо-жайына кайрылсак:

23-апрель күнү интернетте бала бакчада 50гө жакын бала бир бөлмөдө, бир керебетке 4-5тен узун-туурасынан жатканы тартылган видео тараган. Кээ бири батпай калып, полдо уктап жаткандары да бар. Тасма Бишкектеги №1 "Шоола" балдар бакчасында тартылганы аныкталган. Бул видеодон кийин бала бакчага барган балдардын ата-энелери чогулушуп, арыз-муңдарын билдиришкен болчу.