"ЭЛДИК КАБАРга" жооп: "Унаасын арчаны тебелетип токтоткон айдоочуга чара көрүлөт"

"Ош шаарында унаасын жол боюнда отургузулган арчаны тебелетип токтотуп коюптур" деген окурман SUPER.KG порталына кайрылган.

Бул окуяга Ош шаарында "Зайнабетдинов" базарынын жанынан күбө болгонун айткан окурман жаш арчаны тебелеп, токтоп турган унаанын сүрөтүн жиберип, "Мындай айдоочуларга ким чара көрөт? Шаарга өзүбүз кам көрбөсөк, ким кам көрөт?" - деген суроо салган.

Бул тууралуу Ош шаардык мэриясынын басма сөз катчысы Азамат Абсатаровго кайрылганыбызда, ал төмөндөгүдөй жооп узатты.

"Окурман жиберген сүрөттө унаанын номери түшүп калыптыр. Биз аны жазып алып, тиешелүү кызматкерлерге жибердик. Шаарыбызга кам көрүп, ушул сыяктуу терс көрүнүштөргө кайдыгер карабаган тургундарыбызга ыраазычылык билдиребиз. Унаанын ээси табылып, сөзсүз түрдө мыйзам чегинде чара көрүлөт", - деди басма сөз кызматкери.