“Ялла”, Согдиана, экс-мэрлер, жоголгон балдар... Бишкектин “туулган күнүнөн” фоторепортаж

Бүгүн, 29-апрелде Бишкек шаарынын 141 жылдыгы борбордук аянтта белгиленди. Көп даярдыкты талап кылган бул концертке миңден ашуун шаар тургуну күбө болду. Концерт жылдагыдан өзгөчөлөнүп экс-мэрлердин куттуктоосу менен башталды. Москвадан атайын шаарымды куттуктаганы үчүн келдим деген экс-мэр Нариман Түлеев шаардыктарды майрамы менен куттуктады.

Кечени легендарлуу "Ялла" тобу ачып берсе, көптөн-көп күттүргөн Согдиана жыйынтыктоочу болду. Ортодо кыргыз шоу-бизнесинин жылдыздары коштоп, элдин сүймөнчүлүгүнө айланган ырларын аткарышты. Көрүүчүлөр Мирбек Атабеков менен Кайрат Примбердиев сахнага чыкканда жанданып кетишти.

Концертте чыгыш ыргактарын сүйгөндөр бийлеп, ырдап чер жазышты. Согдиананын аткаруусундагы ар бир ырын эл өзгөчө кабыл алды. Ырчы айым дагы Кыргыз өлкөсүн жакшы көрөрүн, дагы да болсо чыгармачылыгын тартуулап келүүгө макул экенин айтып, күйөрмандары менен жылуу баарлашты.

Майрамдык иш-чара асманды кооздукка бөлөгөн фейерверктин атылышы менен аяктады.

Борбор калаанын 141 жылдыгына келген коноктор концерт бүткөн соң акысыз ташыган автобус, троллейбустарга түшүп, үйлөрүнө сапар алышты. Милициянын маалыматы боюнча, концерт учурунда жоголгон 14 баланын бардыгы ата-энелерине жана туугандарына өткөрүлүп берилди.